छत्रपती शिवाजी महाराज यांच्याबद्दल अपशब्द आणि इतिहास अभ्यासक इंद्रजीत सावंत यांना धमकी दिल्याप्रकरणी अटक केल्यानंतर न्यायालयीन कोठडीत असलेल्या प्रशांत कोरटकरला जामीन मिळाला आहे. कोल्हापूर कोर्टानं त्याला जामीन दिला. मात्र, जामीन मिळूनही कोरटकरची लगेच तुरुंगातून सुटका होण्याची शक्यता कमी आहे, असे सांगितले जात आहे.

छत्रपती शिवरायांबद्दल अपमानास्पद वक्तव्य आणि इतिहास अभ्यासक सावंत यांना धमकी दिल्याप्रकरणी प्रशांत कोरटकर वादात सापडला होता. कोल्हापूरसह राज्यातील विविध ठिकाणी त्याच्याविरोधात गुन्हे नोंदवण्यात आले होते. कोरटकरविरोधात प्रचंड संतापाची लाट उसळली होती. मात्र, कोरटकर हा फरार होता. कोल्हापूर पोलिसांनी त्याला तेलंगणातून अटक केली होती. दुसऱ्या दिवशी कोर्टात हजर करताना त्याच्याविरोधात शिवप्रेमींनी संताप व्यक्त केला होता. आंदोलकांनी त्याला कोल्हापुरी चप्पल दाखवून निषेध केला होता. तर काहींनी त्याच्यावर चिल्लर फेकली होती. एका वकिलानं त्याच्यावर हल्ल्याचा प्रयत्न केला होता.

प्रशांत कोरटकर न्यायालयीन कोठडीत होता. त्याला आज, बुधवारी कोल्हापूर सत्र न्यायालयाने जामीन दिला. मात्र, कोरटकर तुरुंगातून लगेच बाहेर येऊ शकणार नाही असे बोलले जाते. तुरुंगाबाहेर येण्यास त्याला अजून दोन दिवस तरी लागतील, असेही सांगितले जाते. कोर्टात त्याच्या जामिनाची प्रक्रिया पूर्ण करावी लागणार आहे. आज ती पूर्ण होण्याची शक्यता कमी आहे. तसेच उद्या महावीर जयंतीमुळे सुट्टी आहे. त्यामुळे आज प्रक्रिया पूर्ण झाली नाही तर, त्याची सुटका शुक्रवारवर जाऊ शकते.