लातूर जिल्हा परिषद आणि पंचायत समितीच्या निवडणुकीसाठी मतदान प्रक्रिया आज सकाळी साडेसात वाजल्यापासून प्रत्यक्षात सुरू झाली. जिल्ह्यातील एकूण 14 लाख 91 हजार मतदार आज आपला मतदानाचा हक्क बजावत आहेत. जिल्हा परिषद गटासाठी 242 उमेदवार तर पंचायत समितीसाठी 419 उमेदवार निवडणुकीच्या रिंगणात आहेत. दुपारी 1.30 वाजेपर्यंत लातूर जिल्ह्यात 35.94 टक्के मतदान झाल्याची अधिकृत माहिती आहे. लातूर जिल्हा हा माजी मुख्यमंत्री दिवंगत विलासराव देशमुख यांचा जिल्हा असून महापालिकेतही काँग्रेसने सत्ता कायम ठेवली आहे. या पार्श्वभूमीवर जिल्हा परिषद आणि पंचायत समिती निवडणुकीकडे संपूर्ण राज्याचे लक्ष लागले आहे. दरम्यान, समोर आलेल्या एक्झिट पोलनुसार जिल्हा परिषदेत पुढीलप्रमाणे जागा मिळण्याचा अंदाज व्यक्त करण्यात येत आहे

काँग्रेस : 21, भाजप : 20, अजित पवार गट : 8, शिंदे सेना : 3, इतर : 3, शरद पवार गट : 2, वंचित बहुजन आघाडी : 2, ठाकरे सेना : 1.