महाराष्ट्राच्या राजकारणात आगामी काही दिवसांत मोठा भूकंप होण्याची दाट शक्यता व्यक्त केली जात आहे. महायुतीमध्ये मिठाचा खडा पडल्याचं बोललं जात आहे. आगामी महापालिका निवडणुका स्वबळावर लढण्याची तयारी महायुतीतील प्रमुख पक्ष भाजपने केल्याची माहिती सूत्रांकडून मिळते. भाजपच्या बैठकीतही स्वबळावर निवडणुका लढवण्याच्या सूचना देण्यात आल्याची माहिती आहे. भाजप स्वबळाचा नारा देताना दिसत आहे, तर दुसरीकडे महापालिका निवडणुका महायुतीनं एकत्र लढवाव्यात यावर उपमुख्यमंत्री एकनाथ शिंदे ठाम असल्याचे सांगितले जाते.

स्थानिक स्वराज्य संस्थांच्या निवडणुका येऊ घातल्या आहेत. सर्वच पक्षांची या निवडणुकांची तयारी केल्याचे दिसते. मोर्चेबांधणी सुरू केली आहे. राज्यातील प्रमुख पक्षांनी सदस्य नोंदणी सुरू केली आहे. भाजपकडून स्वबळावर महापालिका निवडणुका लढवण्याची तयारी केली जात असल्याचे दिसून येते, अशी चर्चा राजकीय वर्तुळात सुरू आहे.