छत्रपती संभाजीनगरमध्ये पंचायत समिती सभापती निवडीपूर्वी नाट्यमय घडामोडी पाहायला मिळत आहेत. संभाजीनगर पंचायत समिती सभापती निवडणुकीदरम्यान ठाकरेंच्या शिवसेनेचे ३ सदस्य अचानक गायब झाले. भाजपने तीन पंचायत समितीचे सदस्य पळवल्याचा आरोप ठाकरेंचे नेते अंबादास दानवे यांनी केला आहे. दुपारी दोन वाजता होणाऱ्या निवडणुकीपूर्वी पंचायत समिती परिसरात राडा झाला. भाजप आणि ठाकरेसेनेचे कार्यकर्ते आक्रमक झाले.

पंढरपूर गणाच्या सदस्य लताबाई कानडे, वडगाव कोल्हाटी 101 गणाचे सदस्य सतीश हिवाळे, वडगाव कोल्हाटी 102 गणाचे सदस्य दत्तात्रय वर्पे हे ३ सदस्य गायब झाले आहेत. राज्याचे विधान परिषदेचे माजी विरोधी पक्ष नेते अंबादास दानवे आणि भाजपच्या पदाधिकाऱ्यांमध्ये शिवसेनेचे ३ पंचायत समिती सदस्य पळवून नेल्याने वाद झाल्याचे पंचायत समिती परिसरात जोरदार राडा झाला. भाजपच्या सभापतीपदाच्या उमेदवाराची अंबादास दानवे यांनी कॉलर पकडल्यामुळे वातावरण तापले आहे.