डॉ. मनमोहन सिंग यांचे काल रात्री निधन झाले. वयाच्या ९२ व्या वर्षी त्यांनी अखेरचा श्वास घेतला. त्यांच्या निधनाने सर्व स्तरांतून हळहळ व्यक्त होत आहे. राजकीय विश्वाबरोबरच इतर क्षेत्रातून देखील त्यांना श्रद्धांजली अर्पण करण्यात येत आहे. मनमोहन सिंग यांच्यावर उद्या शासकीय इतमामात अंत्यसंस्कार करण्यात येणार आहेत. तत्पूर्वी आज देशाचे पंतप्रधान नरेंद्र मोदी यांनी मनमोहन सिंग यांना श्रद्धांजली अर्पण केली आहे.

यावेळी त्यांनी मनमोहन सिंग यांच्याबद्दल बोलताना म्हंटलं की, मनमोहन सिंग यांनी आर्थिक संकटाने घेरलेल्या देशात नव्या अर्थव्यवस्थेचा मार्ग मोकळा केला. डॉ. मनमोहन सिंग यांचे जीवन त्यांच्या प्रामाणिकपणाचे आणि साधेपणाचे प्रतिबिंब होते. जनतेशी आणि देशाच्या विकासाची त्यांची बांधिलकी भविष्यात नेहमीच आदराने पाहिली जाईल. देशवासीयांच्यावतीने मी मनमोहन सिंग यांना श्रद्धांजली अर्पण करतो. त्यांनी पक्षीय राजकारणाच्या वर उठून प्रत्येक पक्षातील लोकांशी संपर्क ठेवला. इथे दिल्लीत आल्यानंतरही मी त्यांना भेटायचो, बोलायचो. या कठीण काळात मी त्यांच्या कुटुंबियांप्रती संवेदना व्यक्त करतो. मी सर्व देशवासियांच्या वतीने श्रद्धांजली अर्पण करतो. त्यांची नम्रता आणि सौम्यता हे त्यांच्या संसदीय जीवनाचे वैशिष्ट्य ठरले, असं मोदी यावेळी म्हणाले.