महाराष्ट्रातील मराठवाड्यासह इतर भागात भयंकर पूरस्थिती आहे. शेतकऱ्यांच्या जमिनी खरडून गेल्या आहेत. पुढच्या काही वर्षांत शेती कशी करावी, कसं जगावं, असा यक्षप्रश्न बळीराजासमोर आहे. सरकारनं मदत जाहीर केली असली तरी ती तुटपुंजी ठरते. यावरून आता ठाकरे गटाचे खासदार संजय राऊत यांनी पंतप्रधान नरेंद्र मोदी आणि केंद्रीय मंत्री अमित शहा यांच्यावर टीका केली आहे.

महाराष्ट्रातील मराठवाड्यातील अनेक जिल्ह्यांना पुरानं वेढा घातला आहे. शेतातील पिके पुराच्या पाण्यात वाहून गेली आहेत. शेतकरी पुरता उद्ध्वस्त झाला आहे. ओला दुष्काळ जाहीर करण्याची, तसेच ठोस आर्थिक मदतीची मागणी बळीराजाकडून केली जात आहे. राज्य सरकारनं आर्थिक मदतीची घोषणा केली आहे. पण ती तुटपुंजी आहे, असं शेतकऱ्यांचं म्हणणं आहे. मुख्यमंत्री, उपमुख्यमंत्री, मंत्री यांच्यासह सत्ताधारी पक्षांचे आमदार अनेक जिल्ह्यांचे दौरे करून पीक नुकसानीची पाहणी करत आहेत. पण दुसरीकडं पंतप्रधान नरेंद्र मोदी, अमित शहा यांच्यासह केंद्रातील कुणीही मंत्री नुकसानीच्या पाहणीसाठी महाराष्ट्रात आले नाहीत, असा विरोधकांचा आरोप आहे. संजय राऊत यांनी तर थेट पंतप्रधान मोदींवर टीकास्त्र डागलंय.

मराठवाडा पाण्याखाली गेला आहे. शेती नष्ट झाली आहे. जर अशा प्रकारचं संकट गुजरातवर कोसळलं असतं तर, देशाचे पंतप्रधान सर्वात आधी हवाई दलाचं विमान घेऊन गेले असते. गुजरातचे अमित शहा तेथे धावून गेले असते. विमानातून त्यांनी गुजरातला हजारो कोटींचं पॅकेज जाहीर केलं असतं. पण अद्याप या मराठवाडा आणि महाराष्ट्रासाठी या दोन्ही नेत्यांनी केंद्राकडून कोणतीही मदतीची घोषणा केली नाही, असं संजय राऊत म्हणाले. राज्य सरकारनं मदत जाहीर केल्याची बाब संजय राऊतांच्या लक्षात आणून दिली असता, ते काय मदत करतील. अंदाजे ७० लाख एकर शेती उद्ध्वस्त झाली आहे. ते काय करणार आहेत? जवळपास ४० लाख शेतकऱ्यांचं नुकसान झालं आहे. आता तिजोरीत पैसे तरी आहेत का? असा संतप्त सवाल राऊत यांनी उपस्थित केला.