पिंपरी चिंचवड़ शहरातील चऱ्होली येथील पंतप्रधान आवास योजनेच्या इमारतीच्या मुख्य प्रवेशद्वाराचे साधारण दीड टनाचे लोखंडी गेट निकृष्ट दर्जाच्या कामामुळे स्थानिक नागरिकाच्या अंगावर पडले त्यात ते जखमी झाले असून त्यांच्यावर खाजगी रुग्णालयात उपचार सुरू आहेत.

चऱ्होलीच्या आवास योजनेत प्रचंड समस्या असून अतिशय निकृष्ट दर्जाचे काम याठिकाणी झाल्याचे स्थानिक नागरिक सांगत आहेत. यातील ९०% लाभार्थ्यांना लिकेजचा त्रास सहन करावा लागत असून छोटे मोठे बरेच प्रश्न याठिकाणी वारंवार सांगूनही सुटत नसल्याची स्थानिक नागरिकांची भावना आहे.

अशातच काल दिनांक १३ डिसेंबर २०२५ रोजी साडे आठ वाजता ही घटना घडली. या घटनेत स्थानिक नागरिक राहुल जाधव यांच्या अंगावर हे दीड टनाचे लोखंडी गेट पडले. मात्र सुदैवाने गेट पडल्यावर ते पुढे फेकले गेले त्या गेटखाली सापडले असते तर मोठी जीवितहानी झाली असती सदर घटनेला जबाबदार असणाऱ्या अधिकारी व कॉन्ट्रॅक्टर यांच्यावर कायदेशीर कारवाई करण्यासाठी स्थानिक नागरिकांनी आक्रमक भुमिका घेतली आहे. तरी या घटनेविरुद्ध येथील निकृष्ट दर्जाच्या कामाविरोधात दिघी पोलीस ठाण्यात तक्रार दाखल करणार असून महापालिकेवर भव्य मोर्चा काढणार आहेत. असा इशारा स्थानिकांनी दिला आहे.