मुंबईतील लोकल ट्रेनने विनातिकीट प्रवास करणे आता महागात पडणार आहे. कारण, फुकट्या प्रवाशांना आळा घालण्यासाठी मध्य रेल्वेच्या मुंबई विभागाने मोठा निर्णय घेतला आहे. विनातिकीट प्रवास करताना कुणी प्रवासी आढळून आल्यास त्याच्याकडून दंडाची मोठी रक्कम आकारली जाणार आहे. त्यामुळे तुम्हीही जर लोकलने प्रवास करत असाल तर ही बाब लक्षात ठेवणं गरजेचं आहे.

मुंबईकरांची जीवनवाहिनी म्हणून लोकल ट्रेनकडे बघितलं जातं. दररोज लाखो प्रवासी लोकल ट्रेनमधून प्रवास करत असतात. मुंबईच्या एका टोकापासून दुसऱ्या टोकापर्यंत जायचं असल्यास लोकलचा प्रवास सुखकर ठरतो. मात्र, मागील काही दिवसांपासून लोकल ट्रेनमध्ये फुकट्या प्रवाशांची संख्या वाढली आहे.

त्यामुळे लोकल ट्रेनच्या उत्पन्नाला मोठा फटका बसत आहे. हीच बाब लक्षात घेता मध्य रेल्वेच्या मुंबई विभागाने विनातिकीट प्रवास करणाऱ्या प्रवाशांकडून आकारण्यात येणाऱ्या दंडाची रक्कम वाढवली आहे. जर प्रवाशांनी दंड भरला नाही तर त्याला जेलमध्ये देखील टाकले जाऊ शकते.