Panipuri Viral Video: तुम्हालाही पाणीपुरी खायला आवडते का? मग ही बातमी नक्की वाचा. पाणीपुरीप्रेमींना धक्का देणारी घटना समोर आली असून, पाणीपुरी खायला गेलेल्या एका फूड ब्लॉगरला पाणीपुरीच्या गोड पाण्यात चक्क जिवंत उंदीर आढळून आला. हा प्रकार पंजाबमधील फिरोजपूर येथे घडला असून, संबंधित व्हिडीओ सध्या सोशल मीडियावर तुफान व्हायरल होत आहे.

फूड ब्लॉगरने रस्त्यावरील एका पाणीपुरीच्या गाडीवर व्हिडीओ शूट करत असताना गोड पाण्याच्या भांड्यात हालचाल दिसली. नीट पाहिल्यानंतर त्या भांड्यात जिवंत उंदीर असल्याचे स्पष्ट झाले. हा धक्कादायक प्रकार कॅमेऱ्यात कैद झाल्यानंतर ब्लॉगरने तत्काळ व्हिडीओ सोशल मीडियावर शेअर केला.

व्हिडीओ व्हायरल होताच नागरिकांमध्ये संतापाची लाट उसळली आहे. रस्त्यावरील खाद्यपदार्थांच्या स्वच्छतेबाबत गंभीर प्रश्न उपस्थित होत असून, अनेकांनी अन्न व औषध प्रशासनाकडून कठोर कारवाईची मागणी केली आहे. दरम्यान, या घटनेनंतर स्थानिक प्रशासनाकडून संबंधित पाणीपुरी विक्रेत्याची चौकशी सुरू करण्यात आल्याची माहिती मिळत आहे.