कोट्यवधी वारकरी आणि वैष्णवांचे श्रद्धास्थान असलेल्या पंढरपूरच्या विठ्ठल मंदिरात दर्शनासाठी येणाऱ्या परदेशी भक्तांसाठी वस्त्रसंहिता लागू करण्याच्या हालचाली सुरू झाल्या आहेत. भारतीय संस्कृती आणि वारकरी परंपरेनुसार पोशाख परिधान करणाऱ्या परदेशी भक्तांना विठ्ठलाच्या दर्शनासाठी थेट प्रवेश देण्याचा प्रस्ताव आहे. यासाठी मंदिर प्रशासनाकडून एसओपी अर्थात प्रमाणित कार्यपद्धती तयार करण्याचे काम सुरू करण्यात आले आहे. पंढरपूरच्या विठ्ठल-रुक्मिणी मंदिरात दरवर्षी देशभरातून लाखो भाविक दर्शनासाठी येतात. त्याचबरोबर परदेशातूनही अनेक विठ्ठलभक्त पांडुरंगाच्या दर्शनासाठी पंढरपुरात दाखल होतात. या परदेशी भक्तांनी विठ्ठल दर्शनावेळी भारतीय आणि वारकरी परंपरेला साजेसा पोशाख परिधान करावा, अशी भूमिका मांडण्यात आली आहे.याबाबत जिल्हाधिकारी आणि वारकरी महाराज मंडळींच्या सल्लागार परिषदेने ठराव करून मंदिर समितीकडे पाठवला आहे. या ठरावाच्या अनुषंगाने वस्त्रसंहितेची नियमावली आणि अंमलबजावणीची कार्यपद्धती निश्चित करण्याचे काम सुरू असल्याची माहिती आहे.