पंढरपूर : अर्थमंत्री अजित पवार यांनी विधानसभेच्या पावसाळी अधिवेशनात महिलांसाठी लाडकी बहीण योजना सुरू करण्याची घोषणा केली. या योजनेचा लाभ घेण्यासाठी महिला आतुर झाल्या आहेत. पंढरपूर येथील तलाठी कार्यालयात आज सकाळपासूनच अर्ज घेण्यासाठी महिलांनी मोठी गर्दी केली.

तलाठी कार्यालयात उत्पन्न दाखला मिळवण्यासाठी महिलांनी लांबच लांब रांगा लावल्या. अर्ज मिळवण्यासाठी महिलांनी एकमेकींना ढकलाढकलही केली. अचानक गर्दी वाढल्याने तलाठ्यांना मोठ्या अडचणीचा सामना करावा लागला. त्यांनी तातडीने कार्यालयाचे कामकाज बंद केले आहे.

त्यामुळे अर्ज घेण्यासाठी महिला ताटकळत उभ्या आहेत. या संपूर्ण प्रकाराचा व्हिडीओ समोर आला आहे. यामुळे लाडकी बहीण योजनेचा मोठा गाजावाजा करणाऱ्या सरकारला जाग येईल का? असा प्रश्न नागरिक उपस्थित करत आहेत.