शिवसेना शिंदे गटाच्या डहाणू विधानसभा समन्वयक अशोक धोडी यांच्या अपहरण प्रकरणात आता पोलीस चौकशीला वेग आला आहे. डहाणू आणि तलासरी तालुक्यातील झाई बोरीगाव रस्त्यावरील सीसीटीव्ही पोलिसांनी सध्या ताब्यात घेतले असून या सीसीटीव्हीच्या आधारे धोडी यांचा शोध सुरू करण्यात आला आहे.

शिवसेनेचे माथाडी कामगार सेनेचे तलासरी तालुकाध्यक्ष अशोक धोडी यांचे अपहरण झाल्याचे सांगण्यात येत असून डहाणू येथून त्यांच्या खाजगी ब्रिजा कारने घरी परतत असताना २० तारखेच्या सायंकाळी ६ वाजून ५५ मिनिटांचा भरधाव वेगात जाणाऱ्या गाडीचा सीसीटीव्ही फुटेज समोर आला आहे. झाई बोरीगाव मार्गावरील हा व्हिडिओ असून ब्रिजा कारच्या पुढे एक इको गाडी जाताना दिसते. त्यामागे लाल कलरची ब्रिजा भरधाव वेगात जात असल्याचे सीसीटीव्हीमध्ये दिसत आहे. ज्या ठिकाणचा हा सीसीटीव्ही फुटेज आहे त्यापासून एक किलोमीटरच्या अंतरावरून अशोक धोडी यांचे झाई बोरीगाव घाट रस्त्यावर गाडी आडव्या लावून त्यांचं अपहरण झाल्याचं सांगण्यात येत आहे. अशोक धोडी यांच्या कुटुंबीयांकडून पोलिसांना काही संशयीतांची नावं देखील देण्यात आली असून मोबाईल आणि या संशयीतांच्या मागावर सध्या पोलीस असल्याचं पालघरचे पोलीस अधीक्षक बाळासाहेब पाटील यांनी सांगितल आहे. तर धोडी अपहरण प्रकरणात पोलिसांनी तपासाचा वेग आणखी वाढवावा अशी मागणी पालघरचे शिवसेना शिंदे गटाचे जिल्हाप्रमुख कुंदन संख्ये यांनी केली आहे.