पालघर: येथील कमला पार्क परिसरात भरदिवसा एका इसमावर धारदार कुऱ्हाडीने हल्ला केल्याची धक्कादायक घटना घडली. या हल्ल्यात बाबूलाल फुलचंद यादव गंभीर जखमी झाले असून त्यांच्यावर रुग्णालयात उपचार सुरू आहेत. मिळालेल्या माहितीनुसार, हल्ला करणाऱ्या इसमाला घटनास्थळीच स्थानिकांनी पकडले. मुख्य बाजारपेठेतील एका झाडाला त्याला बांधून नागरिकांनी बेदम चोप दिला. त्यानंतर आरोपीला पोलिसांच्या स्वाधीन करण्यात आले. या घटनेमुळे परिसरात एकच खळबळ उडाली असून पोलिस पुढील तपास करत आहेत.