इंदापुरातील भाजप नेते हर्षवर्धन पाटील यांनी आज भाजपला रामराम करत राष्ट्रवादी शरदचंद्र पवार पक्षात जाण्याची घोषणा केली आहे. यानंतर आता इंदापूरात बॅनरबाजी सुरु झाल्याचं पाहायला मिळत आहे. अज्ञातांकडून शहरात एक बॅनर लावण्यात आला आहे. ज्याद्वारे हर्षवर्धन पाटलांच्या पक्ष प्रवेशावर नाराजी व्यक्त करण्यात आली आहे. शरद पवार यांच्या भूमिकेवर भाष्य करत या बॅनरवर लिहिलं आहे की, आज पवार साहेबांनी इंदापूर तालुक्यात जो निर्णय घेतला. तो म्हणजे तोंड दाबून बुक्क्यांचा मार, अशी अवस्था तालुक्यातील सर्व शेतकऱ्यांची झाली आहे. दोघांनाही जनता कंटाळले होती. माझा राजा असा नव्हता, अशा आशयाचे बॅनर लावून अज्ञातांकडून हर्षवर्धन पाटलांसमोर एक प्रकारचे आव्हानं निर्माण केलं आहे. दरम्यान, हा बॅनर शरद पवार गटाच्या कार्यकर्त्यांनीच लावला असावा, अशी चर्चा आहे.