मराठा आरक्षणासंदर्भातील आरक्षणाचा जीआर सरकारने काढल्यानंतर राज्यात ओबीसी नेते आक्रमक झाले आहे. या जीआरला मंत्री छगन भुजबळ हे देखील सुरुवातीपासून विरोध दर्शवत आहे. याच पार्श्वभूमीवर मुख्यमंत्री देवेंद्र फडणवीस यांनी आज सर्व ओबीसी नेत्यांची बैठक बोलावली होती. या बैठकीत छगन भुजबळ हे चांगलेच आक्रमक झाले होते. विधी आणि न्याय विभागाची परवानगी न घेता हैदराबाद गॅझेटच्या संदर्भात तुम्ही शासन निर्णय कसा काढला असा प्रश्न भुजबळांनी विचाराला. तसेच अनेक ठिकाणी खाडाखोड करून, नोंदी बदलून कुणबी प्रमाणपत्र काढली जात असल्याचा दावा त्यांनी केला. मुख्यमंत्र्यांच्या या बैठकीत अजित पवार, एकनाथ शिंदे, पंकजा मुंडे, विजय वडेट्टीवार, चंद्रशेखर बावनकुळे आणि छगन भुजबळ यांच्यासह इतर नेते उपस्थित होते. या बैठकीत भुजबळ हे आक्रमक झाल्याचे पाहायला मिळाले.