सध्या राज्यात महापालिकेच्या निवडणुकीची रणधुमाळी सुरू आहे. 30 डिसेंबर रोजी अर्ज भरण्याचा शेवटचा दिवस होता. याच दिवशी विशेष म्हणजे भाजपमध्ये जो राडा झाला तो संपूर्ण महाराष्ट्राने बघितला. निष्ठावंतांना डावलून उपऱ्यांना उमेदवारी दिल्याने कार्यकर्त्यांचा असंतोष उफाळून आला. कुठे एबी फॉर्मसाठी सिनेस्टाईल पाठलाग तर काही ठिकाणी अक्षरशः टाहो फोडत आपला संताप व्यक्त केला आणि आत्मदहनाचा देखील प्रयत्न पाहायला मिळाला.

मात्र या घटनांना 24 तासही उलटले नसताना आज भाजपचे सहा नगरसेवक बिनविरोध निवडून आले. कल्याण डोंबिवली महानगरपालिकेत रेखा चौधरी,आसावरी नवरे आणि रंजना पेणकर तर पनवेलमध्ये नितीन पाटील यांनी विजयाचा गुलाल लावला आहे.

तसेच धुळे येथील मनहापालिका निवडणुकीत देखील भाजपचे दोन उमेदवार हे बिनविरोध निवडून आल्याने पक्षाच्या गोटात प्रचंड उत्साहाचे वातावरण पाहायला मिळत आहे.

प्रभाग क्रमांक 1 मधून उज्ज्वला रणजित भोसले आणि प्रभाग क्रमांक 6 ब मधून जोत्स्ना प्रफुल्ल पाटील यांची बिनविरोध निवड झाली आहे.