छत्रपती शिवाजी महाराजांबद्दल आक्षेपार्ह विधान करणाऱ्या प्रशांत कोरटकर याला मुंबई उच्च न्यायालयाकडूनही दिलासा मिळालेला नाही. त्याच्या अटकपूर्व जामिनावरील सुनावणी सोमवारपर्यंत तहकूब करण्यात आली आहे. कोल्हापूर सत्र न्यायालयाने त्याचा अंतरिम जामीन अर्ज फेटाळला. त्यामुळे गेल्या काही दिवसांपासून फरार असलेल्या कोरटकरला अटक कधी होणार असा प्रश्न उपस्थित केला जात आहे.

कोल्हापूरच्या सत्र न्यायालयाने प्रशांत कोरटकरला मोठा दणका दिला होता. त्याचा अटकपूर्व जामीन नाकारण्यात आला होता. कोणत्याही क्षणी कोरटकरला अटक होण्याची शक्यता होती. असं असतानाही त्याला अजूनही अटक झालेली नाही. कोरटकर अद्याप फरार आहे. सुरुवातीला दोनशे पोलीसांचा बंदोबस्त असतानाही तो तेथून निसटला कसा, हा प्रश्न अजूनही अनुत्तरीत आहे. काही पोलिसांचा त्याला पाठबळ आहे का? राज्य सरकरकडून त्याचे गुन्हे पाठिशी घातले जात आहेत का, असे अनेक प्रश्न असून, कोरटकरला जामीन दिला जाऊ नये असे आमचे म्हणणे आहे, असे वकील असीम सरोदे यांनी सांगितले.