संजय तुमराम, साम टीव्ही न्यूज

पश्चिम आशियात युद्ध पेटलंय. मात्र, भारतासह अनेक देशांत गॅस तुटवड्याचा भडका उडालाय. महाराष्ट्रातील शहरी, तसेच ग्रामीण भागासह देशभरात याची झळ पोहोचू लागली आहे. बहुतांश ठिकाणी गॅस वितरण एजन्सीबाहेर सिलिंडरसाठी, तसेच पेट्रोल, सीएनजी पंपांबाहेर रांगा लागलेल्या दिसत आहेत. काही ठिकाणी तर गॅस सिलिंडरवरून हाणामाऱ्याही झाल्याचे चित्र आहे. महाराष्ट्रातील 'गॅस' गोंधळावर मुख्यमंत्री देवेंद्र फडणवीस यांनी प्रतिक्रिया दिली आहे. देशात घरगुती गॅसचा कुठलाही तुटवडा नाही. केंद्र सरकारनंही याबाबत स्पष्ट केलंय. जितकी घरगुती गॅस सिलिंडरची मागणी आहे, तितका पुरवठा करण्यात येत आहे, असं फडणवीस यांनी सांगितलं.

नागरिकांनी घाबरण्याचे किंवा पॅनिक होण्याचे कोणतेही कारण नाही, असं आवाहनही मुख्यमंत्री फडणवीस यांनी केलं. दुसरीकडं, पुरेसा साठा आपल्याकडे उपलब्ध असून, कुठल्याही प्रकारची टंचाई नाही, असं केंद्र आणि राज्य सरकारकडून सांगितले जात आहे. यावर केंद्रातील, तसेच राज्यातील विरोधी पक्षांकडून टीका करण्यात येत आहे. त्यावरही मुख्यमंत्री फडणवीस यांनी स्पष्टीकरण देत विरोधकांवर टीकास्त्र सोडलंय.

काँग्रेस पक्ष जाणीवपूर्वक लोकांमध्ये भीतीचे वातावरण निर्माण करत आहे. लोकांनी गॅससाठी रांगा लावाव्यात असा प्रयत्न केला जात असल्याचा आरोपही त्यांनी केला. काही राजकीय पक्ष जाणीवपूर्वक अफवा पसरवत असल्याचेही ते म्हणाले.