भाजपने त्यांचा नेता ठरवला असून भाजपच्या गटनेतेपदी देवेंद्र फडणवीस यांच्या नावावर शिक्कामोर्तब झालं आहे. विधीमंडळ पक्षाचा नेता निवडीसाठी भाजपचे केंद्रीय निरीक्षक विजय रुपाणी आणि निर्मला सीतारामन यांची उपस्थिती होती. विधानभवनात भाजपा आमदारांची बैठक बुधवारी पार पडली. यात ही निवड करण्यात आली आहे.

दरम्यान, विधिमंडळाच्या गटनेते पदी देवेंद्र फडणवीस यांच्या नावाची अधिकृत घोषणा झाल्यानंतर निर्मला सीतारमन यांनी फडणवीस यांचे स्वागत करुन शुभेच्छा दिल्या. यावेळी बोलताना त्या म्हणाल्या की, लोकसभा निवडणुकीनंतर महाराष्ट्रात विधानसभेला लागलेला निकाल हा आमच्या अपेक्षेपेक्षा अधिक आहे. ही विधानसभा निवडणूक ऐतिहासिक ठरली आहे. राज्याच्या जनतेचा कौल स्पष्ट आहे. महाराष्ट्राचं डबल इंजिन सरकार पंतप्रधान नरेंद्र मोदी यांच्या नेतृत्वात येणाऱ्या काळात राज्याचा सर्वांगीण विकास करण्याचा प्रयत्न करेल, असं म्हणत त्यांनी फडणवीस यांना शुभेच्छा दिल्या आहेत.

Edited By Rakhi Rajput