नाशिकच्या जिल्हा रुग्णालयातून बाळ चोरून नेल्याचा धक्कादायक प्रकार उघडकीस आला आहे. अवघ्या पाच दिवसाचं बाळ अज्ञात महिलेनं चोरून नेल्याने जिल्हा रुग्णालयात खळबळ उडाली आहे.

सुमन अब्दुल खान (रा. सटाणा, जि. नाशिक) हिची प्रसूती नुकतीच नाशिकच्या जिल्हा शासकीय रुग्णालयात झाली आहे. प्रसूतीनंतर बाळाला आणि आईला वेगवेगळ्या ठिकाणी ठेवण्यात आले होते. याकाळात एक अनोळखी महिला बाळाशी खेळण्यासाठी येत होती. ओळख असल्याचे भासवून ती बाळाला खेळवायची. त्यानंतर आज ही महिला बाळाला त्याच्या वडिलांकडे घेऊन जाते म्हणून घेऊन गेली. मात्र ती बाळाला घेऊन निघून गेली. याघटनेची माहिती मिळताच वरिष्ठ पोलीस अधिकारी जिल्हा रुग्णालयात तपासासाठी दाखल झाले. नाशिकच्या जिल्हा रुग्णालयात नवजात बालकांना चोरणारी टोळी सक्रिय असल्याचा संशय पोलिसांनी व्यक्त केला आहे. या प्रकरणी पोलीस तपास करत असून नाशिकच्या सरकारवाडा पोलीस ठाण्यात अज्ञात महिलेविरोधात गुन्हा दाखल करण्यात आला आहे.