मंत्रभूमी म्हणून ओळख असलेली, प्रभू श्रीरामाच्या पदस्पर्शाने पावन झालेली नाशिक नगरी पुन्हा एकदा अध्यात्मिक रंगात रंगली आहे. आगामी कुंभमेळ्याच्या पार्श्वभूमीवर देशभरातील प्रमुख साधू-महंत नाशिकमध्ये दाखल झाले असून, गोदावरीच्या तीरावर आध्यात्मिक ऊर्जा निर्माण झाली आहे.

निर्वाणी, निर्मोही आणि दिगंबर या तीनही प्रमुख आखाड्यांचे साधू-महंत नाशिकमध्ये पोहोचले असून, त्यांनी आज गोदा घाटावर गोदावरी आरतीमध्ये सहभाग घेतला. मंत्रोच्चारांनी नाशिकचा परिसर दुमदुमून गेला होता. गोदावरीच्या किनाऱ्यावर भक्तांनी मोठ्या संख्येने हजेरी लावली होती. निसर्गरम्य वातावरण आणि अध्यात्मिक ऊर्जा यामुळे भाविक तल्लीन झाले होते.

दरम्यान, येणाऱ्या कुंभमेळ्याच्या तयारीचा आढावा घेण्यासाठी मुख्यमंत्री देवेंद्र फडणवीस उद्या नाशिक दौऱ्यावर येणार आहेत. यावेळी ते सर्व साधू-महंतांसोबत विशेष बैठक घेऊन कुंभमेळ्याच्या अधिकृत तारखा जाहीर करणार आहे.