गंगापूर धरणातून तब्बल ३ हजार क्यूसेक वेगाने पाण्याचा विसर्ग सुरू करण्यात आल्यानं गोदावरी नदीची पाणीपातळी वाढली आहे. परिणामी रामकुंड आणि गोदाघाट परिसराला गोदावरीच्या पाण्याचा वेढा बसला असून नदीकाठावरील नागरिकांना सतर्कतेचा इशारा प्रशासनाकडून देण्यात आला आहे. गंगापूर, त्र्यंबकेश्वर आणि हरसूल भागात पावसाचा जोर कायम असतानाच शनिवारीच्या तुलनेत रविवारी पावसात थोडीशी घट झाली. मात्र धरणांतून पाण्याचा विसर्ग सुरूच असल्याने शहरासह जिल्ह्यातील अनेक नद्या आणि धरणं तुडुंब भरली आहेत. सध्या गंगापूर धरणाचा पाणीसाठा ९७ टक्क्यांवर पोहोचला असून जिल्ह्याचाही पाणीसाठा ९७ टक्क्यांवर आहे. त्यामुळे पुढील पावसाच्या पार्श्वभूमीवर प्रशासनाकडून दक्षतेचे आवाहन करण्यात आलं आहे.