अभिजीत सोनावणे, नाशिक | साम टीव्ही

नाशिकमध्ये गोदावरी नदीला पूर आला आहे. गंगापूर धरणातून गोदावरी नदीपात्रात पाण्याचा विसर्ग सुरू करण्यात आल्याने गोदावरी ओसंडून वाहत आहे. रामकुंड आणि गोदा घाटावरील मंदिरांना गोदावरीच्या पुराच्या पाण्याचा वेढा पडला आहे. दुपारनंतर गंगापूर धरणातून पाण्याचा विसर्ग आणखी वाढवणार आहेत. नदीकाठच्या नागरिकांना प्रशासनानं सतर्कतेचा इशारा दिला आहे. नाशिकमध्ये रामकुंड परिसरात वाहनं अडकलेली होती. ती बाहेर काढण्यात आली. नदीकाठावर ही वाहनं पार्क करण्यात आली होती. गोदावरीच्या पाणीपातळीत अचानक वाढ झाली. त्यामुळं ही वाहनं अडकली होती. अग्निशमन दलाच्या जवानांनी तातडीनं घटनास्थळी धाव घेतली. ती वाहनं पाण्यातून बाहेर काढली. गोदावरीच्या पाणीपातळीत वाढ होत असल्यानं गोदा काठावर वाहने पार्क करू नयेत, असं आवाहन प्रशासनाकडून करण्यात येत आहे.