नाशिकमधील अंबड आजादनगर परिसरात गावगुंडांनी दहशत माजवत तलवारी व कोयत्यांच्या जोरावर आठ वाहनांची तोडफोड केली आहे. दोन कार, एक टेम्पो, रिक्षा आणि तीन दुचाकी यांचे मोठ्या प्रमाणात नुकसान करण्यात आले असून, काही घरांवर दगडफेकही करण्यात आली आहे. या घटनेमुळे परिसरात भीतीचं वातावरण निर्माण झालं आहे.संध्याकाळच्या सुमारास हातात तलवारी आणि कोयते घेऊन अल्पवयीन तरुणांचं टोळकं गल्ल्यांमधून फिरत होतं. त्यांनी आरडाओरड करत घरांच्या काचा फोडल्या, वाहनांवर हल्ले केले आणि रस्त्यावर गोंधळ घातला.

स्थानिक नागरिकांनी या प्रकारामुळे संतप्त प्रतिक्रिया व्यक्त केल्या असून, "गावात पोलिसांचा धाकच उरलेला नाही," असा आरोप केला आहे.या प्रकरणी अंबड पोलीस ठाण्यात गुन्हा दाखल करण्यात आला असून, पोलिसांनी चार अल्पवयीन मुलांना ताब्यात घेतले आहे. पुढील तपास सुरू असून, इतर आरोपींचा शोध घेतला जात आहे.