पुणे जिल्ह्यातल्या भोर तालुक्यातील नसरापूरमध्ये ६५ वर्षीय व्यक्तीने ४ वर्षांच्या मुलीवर लैंगिक अत्याचार करून तिची हत्या केली. या घटनेवरून नसरापूरमधील ग्रामस्थ चांगलेच आक्रमक झाले आहेत. संतप्त ग्रामस्थांनी आरोपीला फाशीची शिक्षा देण्याची मागणी केली. त्यांनी मुंबई- बंगळुरू महामार्गावरील नवले पूलावर रास्तारोको केला. आरोपीवर कारवाई होत नाही तोपर्यंत पीडित मुलीच्या मृतदेहावर अंत्यसंस्कार करण्यास ग्रामस्थांनी नकार दिला. या रास्तारोको आंदोलनामुळे नवले पूलावर मोठी वाहतूक कोंडी झाली आहे. याठिकाणी दोन किलोमीटरपर्यंत वाहनांच्या रांगा लागल्या आहेत.

पीडित मुलगी नसरापूरला आजोळी आजीकडे आली होती. त्यावेळी आरोपीने चार वर्षांच्या चिमुकलीला वासरू दाखवतो सांगत गोठ्यात नेले. त्याठिकाणी त्याने तिच्यावर लैंगिक अत्याचार केले आणि नंतर तिची हत्या केली. त्याने तिचा मृतदेह गोठ्यात शेणाच्या ढिगाऱ्याखाली लपवून ठेवला होता. आरोपी चिमुकलीला गोठ्याच्या दिशेने घेऊन जात असल्याचे सीसीटीव्हीत कैद झालं त्यामुळे ही घटना उघडकीस आली.