मुंबई : नांदेड जिल्ह्यात मागील काही दिवसांपासून मुसळधार पावसाने थैमान घातले होते. तीन दिवस पावसाचा जोर कायम असल्याचं पाहायला मिळालं होती. काल ३ सप्टेंबरच्या रात्रीपासून पावसाने विश्रांती घेतलीय. त्यामुळे नदी नाल्यांचा पूर ओसरण्यास सुरुवात झालीय. जनजीवन आता पूर्व पदावर येण्यास सुरुवात झालीय. या पुराच्या पाण्यामुळे मात्र शेती पिकांचं मोठं नुकसान झालंय. जिल्ह्यात साडेतीन लाख हेक्टरवर शेतीचं नुकसान झाल्याचा प्राथमिक अंदाज प्रशासनाने वर्तविलाय.

आज अनेक मंत्री, नेते नांदेड जिल्ह्यातील शेती पिकांच्या नुकसानीची पाहणी करत आहेत. प्रशासन देखील या नुकसानीच्या पंचनाम्यांना सुरुवात करणार असल्याची माहिती मिळतेय. पावसाने दुष्काळाचं सावट दूर केलं परंतु शेतकऱ्यांच्या तोंडाशी आलेला घास हिरावून घेतलाय. पावसाचा फटका शेतकऱ्यांना मोठ्या प्रमाणात बसलाय. पिकं भुईसपाट झाल्यामुळे शेतकऱ्यांचे लाखो रूपयांचे नुकसान झालंय. या पुरामुळे साडेतीन लाखहेक्टर नुकसान झाल्याचा प्राथमिक अंदाज अधिकाऱ्यांनी व्यक्त केलाय.