महाविकास आघाडीच्या जागा वाटपाचा मुहूर्त अखेर ठरला आहे. महाविकास आघाडीचं जागा वाटप नवरात्रीत जाहीर करू असं स्पष्टीकरण काँग्रेसचे प्रदेशाध्यक्ष नाना पटोले यांनी दिलं आहे. ''मुख्यमंत्री पदावरून वाद नाही, संजय राऊत काय बोलतात याकडे लक्ष देऊ नका'' असंही पटोले यांनी म्हंटल आहे.

आगामी विधानसभा निवडणुकीचे वारे राज्यात वाहायला लागले आहेत. त्याच अनुषंगाने महाविकास आघाडीमध्ये जागा वाटपावरून तिढा होता. मुख्यमंत्री पदाच्या दावेदारावरूनही मविआमध्ये वाद असल्याचं बोललं जात होत. संजय राऊत यांनी यावरून काँग्रेसला टोला लगावला होता. मात्र आता काँग्रेस प्रदेशाध्यक्ष नाना पटोले यांनी जागा वाटपाबाबत निर्णय झाला असून नवरात्रीच्या पहिल्या आठवड्यात आम्ही जागा वाटपाचा निर्णय जाहीर करू असं म्हंटल आहे. त्याचबरोबर 'मुख्यमंत्रीपदाबद्दल कोणताही वाद महाविकास आघाडीमध्ये नाही. संजय राऊत काय बोलतात याकडे लक्ष देऊ नका. मुख्यमंत्री महाविकास आघाडीचा असेल.'' असंही पटोले यांनी म्हंटल आहे.