केंद्रीय कॅबिनेट बैठकीत बुधवारी एक देश एक निवडणुकीचा अहवाल मंजूर करण्यात आला आहे. त्यानंतर आता या मुद्द्यावरून विरोधकांनी जोरदार टीका सुरू केली आहे. वन नेशन वन इलेक्शनवरून त्यांना नो इलेक्शन करायचं आहे, असा टोला ठाकरे गटाचे नेते संजय राऊत यांनी लगावला आहे. तर मोदी सरकारला अमेरिकेतील राष्ट्राध्यक्षांसारखी पद्धत आणायची आहे अस जयंत पाटील यांनी म्हंटलं आहे. तर दुसरीकडे एक देश एक निवडणूक यात काय चुकीचं आहे. असा उलट प्रश्न महायुतीचे नेते चंद्रकांत पाटील यांनी केला आहे. त्यामुळं आता या वन नेशन वन इलेक्शनच्या मुद्द्यावरून सत्ताधारी पक्ष आणि विरोधकांत चांगलीच जुंपलेली दिसत आहे.

''जे सरकार मणीपुरला पळून जातं त्यांनी वन नेशन वन इलेक्शनचा फंडा आणावा यात आश्चर्य नाही. या आडून त्यांना नो नेशन नो इलेक्शन आणायचं आहे. ही त्याची तयारी आहे. मोदी संविधानावर हल्ला करत आहेत.'' अशी टीका संजय राऊत यांनी केली आहे. तर देशात लोकशाही कायम राहावी यासाठी बाबासाहेबांनी संविधानाची निर्मिती केली. त्याला संपवण्याचं काम मोदी करत आहेत. अमेरिकेतील राष्ट्राध्यक्षांसारखी पद्धत मोदींना भारतात आणायची आहे.'' असं जयंत पाटील यांनी म्हंटल आहे.

दरम्यान, विरोधक टीका करत असतानाच महायुतीचे नेते चंद्रकांत पाटील यांनी 'देशात आधी एकच इलेक्शन होतं ते तुम्ही बदललं, एक देश एक निवडणूक यात काय चुकीचं आहे? '' असा उलट सवाल केला आहे.