Mumbai–Pune Expressway missing link travel time reduction : मुंबई-पुणे एक्सप्रेस वेवरील अनेक दिवसांपासून रखडलेला 'मिसिंग लिंक' प्रकल्पाने एक महत्त्वाचा टप्पा गाठला आहे. या प्रकल्पामुळे मुंबई आणि पुणे दरम्यानचा प्रवासाचा वेळ जवळपास २५ ते ३० मिनिटांनी कमी होणार आहे. या प्रकल्पातील सर्वात महत्त्वाचा भाग म्हणजे लोणावळा-खंडाळा विभागातील टायगर व्हॅलीजवळ उभारण्यात आलेला ६५० मीटर लांबीचा केबल-स्टेड पूल आहे. हा पूल आता जवळपास पूर्ण झाला आहे. हा पूल जमिनीपासून सुमारे १०० मीटर उंचीवर आहे. हा नवीन मार्ग सुरू झाल्यावर द्रुतगती मार्गावरील घाट सेक्शन टाळता येणार आहे. त्यामुळे मोठ्या प्रमाणात होणारी वाहतूककोंडी कमी होऊन प्रवाशांना मोठा दिलासा मिळेल. हा १३.३ किलोमीटर लांबीचा मार्ग प्रवासाचा वेळ वाचवण्यासाठी आणि प्रवास अधिक सुरक्षित करण्यासाठी महत्त्वपूर्ण ठरणार आहे.