दिवाळीच्या सुट्ट्यांचा आनंद घेण्यासाठी नागरिक घराबाहेर पडत आहेत. मात्र मुंबईकरांना प्रवासादरम्यान मोठ्या अडचणींचा सामना करावा लागत आहे. मुंबई-गोवा महामार्गावर तसेच मुंबई पुणे जुन्या महामार्गावर वाहनांची संख्या वाढल्याने अनेक ठिकाणी वाहतूक कोंडी निर्माण झाली आहे. त्यामुळे प्रवासाला निघालेले पर्यटक रस्त्यातच अडकून पडले आहेत.

दिवाळीच्या सुट्ट्या आणि त्यातच शनिवार-रविवारची जोड मिळाल्याने अनेकांनी फिरायला जाण्याचा बेत आखला आहे. विशेषतः मुंबई आणि उपनगरांमधील नागरिकांनी कोकणाला पसंती दिली आहे. त्यामुळे महामार्गावर खासगी गाड्या, एसटी बस आणि इतर वाहनांची मोठी गर्दी पाहायला मिळत आहे. सुट्ट्यांमुळे कोकणातील पर्यटनस्थळांवरही पर्यटकांची संख्या वाढली आहे. मात्र, महामार्गावरील वाहतूक कोंडीमुळे प्रवाशांचा प्रवासाचा वेळ वाढत आहे. काही किलोमीटरचे अंतर पार करण्यासाठीही वाहनचालकांना बराच वेळ थांबावे लागत आहे.

एकीकडे दिवाळीच्या सुट्ट्यांचा आनंद घेण्यासाठी पर्यटक उत्साहाने घराबाहेर पडले आहेत, तर दुसरीकडे वाहतूक कोंडीमुळे त्यांच्या प्रवासाचा वेग मंदावला आहे. त्यामुळे प्रवाशांना मनस्ताप सहन करावा लागत आहे.