मुंबईकरांसाठी मोठी दिलासादायक बातमी समोर आली आहे. अनेक वर्षापासून रखडलेली इमारतींना अखेर ओक्युपेशन सर्टिफिकेट (ओसी) मिळण्याचा मार्ग मोकळा होणार आहे. म्हाडा, एसआरए आणि इतर प्राधिकरणांच्या पूर्ण झालेल्या इमारतींना सरकारकडून लवकरच ओसी देण्यासाठी धोरण आखले जाणार असल्याची माहिती राज्याचे माहिती व तंत्रज्ञान मंत्री आशिष शेलार यांनी दिली. तब्बल २५ हजारांहून अधिक इमारतींना तांत्रिक व प्रशासकीय कारणांमुळे ओसी मिळालेली नव्हती. त्यामुळे नागरिकांना अनेक अडचणींना सामोरे जावे लागत होते. आता सरकारच्या या निर्णयामुळे लाखो घरकुलधारकांना दिलासा मिळणार असून कायदेशीर मालकी हक्क, वीज, पाणी यांसारख्या सुविधा मिळण्यात गती येणार आहे.