देशातली पहिली इलेक्ट्रिक वॉटर टॅक्सी मुंबईत धावण्यासाठी सज्ज झाली आहे. गेट वे ऑफ इंडिया ते जेएनपीटीदरम्यान ही टॅक्सी चालवण्यात येणार आहे. त्यामुळे मुंबईकरांसाठी ही अत्यंत आनंदाचीच बातमी आहे.

मुंबईत होणाऱ्या वाहतूक कोंडीवर उपाय म्हणून आता जलमार्ग वाहतूकीला चालना देण्यासाठी हा निर्णय घेतला आहे. यासाठी काही वर्षांपूर्वी वॉटर टॅक्सी आणि रोपैक्स फेरी सेवा सुरू करण्यात आली. मात्र पेट्रोल - डिझेलच्या वाढत्या किमती आणि पर्यायाने महागड्या तिकीट दरामुळे मुंबईकरांनी त्याला फारसा प्रतिसाद दिला नव्हता. याच पार्श्वभूमीवर आता इलेक्ट्रिक वॉटर टॅक्सीची संकल्पना पुढे आली आहे. या इलेक्ट्रिक वॉटर टॅक्सीची लांबी १३.२७ मीटर इतकी असणार आहे. तर रुंदी ३.५ मीटर असेल. या इलेक्ट्रिक वॉटर टॅक्सीमध्ये एकावेळी २५ प्रवासी बसू शकतील. याचा वेग १४ नॉट्स इतका असणार आहे. इलेक्ट्रिक वॉटर टॅक्सीची बॅटरी ६४ किलोवॅटची असणार आहे. म्हणजे साधारण ४ तास ही बॅटरी चालू शकेल.