हार्बर रेल्वे मार्गानंतर आता पश्चिम रेल्वेची वाहतूक विस्कळीत झाली आहे. पश्चिम रेल्वेच्या जलद मार्गावरील वाहतूक ठप्प झाली आहे. कांदिवली ते मालाड स्थानकांदरम्यान तांत्रिक बिघाड झाला आहे. गेल्या ४५ मिनिटांपासून पश्चिम रेल्वेची वाहतूक विस्कळीत झाली आहे. चर्चगेट ते विरार या अप आणि डाऊन जलद मार्गावरील वाहतूक पूर्णत: बंद आहे.

पश्चिम रेल्वेच्या धिम्या मार्गावर देखील चर्चगेटच्या आणि विरारच्या दिशेने जाणाऱ्या लोकलसेवा उरिशाने सुरु आहे. पश्चिम रेल्वेची धिम्या मार्गावरील वाहतूक देखील १५ ते २० मिनिटं उशिराने सुरू आहे. त्यामुळे प्रवाशांचे हाल होत आहे. पश्चिम रेल्वे मार्गावरील सर्वच रेल्वे स्थानकांवर प्रवाशांनी गर्दी झाली आहे.

रेल्वेसेवा विस्कळीत झाल्यामुळे प्रवासी लोकलमधून खाली उतरून ते पटरीवरून चालत जात आहेत. अद्याप पश्चिम रेल्वेकडून रेल्वे स्थानकांवर याबाबत कोणतीही अनाऊंसमेंट करण्यात आलेली नाही. त्यामुळे प्रवाशांचा गोंधळ उडाला आहे. प्रत्येक रेल्वे स्थानकावर प्रवासी लोकलची वाट पाहत उभे राहिलेले दिसत आहेत. दुरूस्तीचे काम किती वेळामध्ये पूर्ण होईल याबाबत देखील प्रशासनाकडून अद्याप काहीच सांगण्यात आले नाही.