मुंबईमध्ये मध्यरात्रीपासून सुरू झालेल्या पावसामुळे पूरसदृश परिस्थिती निर्माण झाली असून अनेक कार पुराच्या पाण्यात वाहून गेल्याची घटना समोर आली आहे. सखल भागांमध्ये मोठ्या प्रमाणात पाणी साचल्याने जनजीवन विस्कळीत झालं असून नागरिकांना सतर्क राहण्याचं आवाहन प्रशासनाने केलं आहे.

वसई पूर्वेकडच्या राजवली वाघराहाळ पाडा येथील नाल्यामध्ये कार वाहून जातानाचा व्हिडिओ समोर आला आहे. कारमध्ये एक व्यक्ति बसलेली होती.

पाण्याचा प्रवाह इतका वेगवान होता की या कारला दूरपर्यंत वाहून नेले गेले याच दरम्यान पादचाऱ्यांसाठी बांधलेला एक छोटा पूल देखील कारच्या धडकेमुळे तुटलेला आहे. परिसरातील नागरिकांनी सतर्कतेची भूमिका घेत या गाडीला काढण्यासाठी जेसीबीच्या सहाय्याने प्रयत्न सुरू केले आहेत. पावसाळ्यापूर्वी नाले सफाई आणि पाण्याचा निचरा या व्यवस्थेबाबत करण्यात आलेले दावे प्रत्यक्षात मात्र अपुरे ठरत असल्याचा आरोप स्थानिक नागरिक करत आहे.