मुंबई-गोवा महामार्गावर हातखंबा गावाजवळ भीषण अपघात झाला आहे. एलपीजी गॅसचा एक मोठा टँकर पुलावरून खाली कोसळल्यामुळे परिसरात खळबळ उडाली आहे. अपघातानंतर टँकरमधील गॅस दुसऱ्या सुरक्षित टँकरमध्ये ट्रान्सफर करण्याचे काम युद्धपातळीवर सुरू आहे.सावधगिरीचा उपाय म्हणून हातखंबा गावातील वाणी पेठ परिसरातील नागरिकांना तातडीने सुरक्षित ठिकाणी हलवण्यात आलं आहे. सुदैवाने या दुर्घटनेत जीवितहानी झाल्याची माहिती अद्याप समोर आलेली नाही.

दरम्यान, या अपघातामुळे गेल्या ९ तासांपासून मुंबई-गोवा महामार्गावरील वाहतूक पूर्णपणे ठप्प झाली आहे. महामार्गावर दोन्ही बाजूंना वाहनांच्या लांबच लांब रांगा लागल्या असून प्रवाशांना प्रचंड त्रास सहन करावा लागत आहे. वाहतूक सुरळीत होण्यासाठी आणखी तीन ते चार तास लागण्याची शक्यता व्यक्त करण्यात येत आहे.