संजय गडदे, मुंबई

मुंबईतील गोरेगावमध्ये इमारतीला आग लागल्याने खळबळ उडाली. शालीमार मिरॅकल इमारतीला आग लागली. यावेळी जीव वाचवण्यासाठी दोन जणांनी इमारतीच्या खिडकीमधून उडी मारल्याची धक्कादायक घटना समोर आली आहे. अग्निशमन दलाच्या जवानांनी शर्थीचे प्रयत्न करत इमारतीला लागलेल्या आगीवर नियंत्रण मिळवलं.

गोरेगाव पश्चिमेला दुपारी साडेबाराच्या सुमारास एका इमारतीच्या पाचव्या मजल्यावर आग लागली होती. आगीच्या ज्वाळा आणि धुराचे लोट बाहेर पडू लागले. त्यामुळे इमारतीत असलेल्या लोकांची स्वतःला वाचवण्यासाठी धावपळ उडाली. काही वेळ प्रचंड गोंधळ निर्माण झाला होता. दोन जणांनी घाबरून स्वतःचा जीव वाचवण्यासाठी खिडकीतून उडी मारली. सुदैवाने उडी मारल्यानंतर ते दोघे चौथ्या मजल्यावरील गॅलरीत पडले. सुदैवाने यात कोणतीही जिवीतहानी झाली नाही. ज्या दोघांनी खिडकीतून उडी मारली आणि गॅलरीत पडले, त्यांना गंभीर दुखापत झाली नाही. दरम्यान, अग्निशमन दलाच्या पाच ते सहा गाड्या घटनास्थळी पोहोचल्या. अग्निशमन कर्मचाऱ्यांनी युद्धपातळीवर प्रयत्न करून अवघ्या तासाभरात ही आग आटोक्यात आणली.