सातारा जिल्ह्यातील जावळी तालुक्यातील सावरी गावात एमडी ड्रग्ज बनवणाऱ्या कारखान्यावर मुंबई क्राईम ब्रँचने मोठी कारवाई केली आहे. या कारवाईत कोट्यवधी रुपयांचा एमडी ड्रग्जचा साठा जप्त करण्यात आला असून या प्रकरणात तीन कारागिरांसह एका व्यक्तीला ताब्यात घेण्यात आले आहे. मुंबई क्राईम ब्रँचला सावरी गावात एमडी ड्रग्ज तयार केले जात असल्याची गोपनीय माहिती मिळाल्यानंतर पथकाने छापा टाकला. छाप्यात मोठ्या प्रमाणात एमडी ड्रग्ज, कच्चा माल आणि ड्रग्ज तयार करण्यासाठी वापरण्यात येणारे साहित्य आढळून आले. प्राथमिक माहितीनुसार येथे तयार केलेले एमडी ड्रग्ज मुंबई, पुण्यासारख्या मोठ्या शहरांमध्ये विक्रीसाठी पाठवले जात होते.

दरम्यान ज्या शेडमध्ये हा कारखाना सुरू होता त्या शेडचे मालक गोविंद शिंदकर यांनी या प्रकरणाशी आपला कोणताही संबंध नसल्याचा खुलासा केला आहे. रस्त्याचे काम सुरू असल्यामुळे एका व्यक्तीने कामगारांसाठी शेड मागितले होते आणि त्याच कारणासाठी हे शेड दिल्याचे त्यांनी सांगितले.

मात्र, या शेडमध्ये बेकायदेशीररित्या ड्रग्ज तयार केले जात असल्याची कोणतीही माहिती आपल्याला नव्हती, असेही शिंदकर यांनी स्पष्ट केले. या कारवाईमुळे सातारा जिल्ह्यासह संपूर्ण राज्यात खळबळ उडाली असून, पोलिसांकडून पुढील तपास सुरू आहे. ड्रग्जचे नेटवर्क, त्यामागील सूत्रधार आणि वितरण साखळीचा शोध घेण्यासाठी क्राईम ब्रँचने तपास अधिक तीव्र केला आहे.