विरोधकांच्या ‘सत्याच्या मोर्चा’ विरोधात सत्ताधारी भाजपनेही दंड थोपाटले आहेत. आज मुंबईत भाजपकडून ‘मुक आंदोलन’ आयोजित करण्यात आले असून हे आंदोलन गिरगाव चौपाटीवरील टिळक उद्यानासमोर होणार आहे. भाजपचे प्रदेशाध्यक्ष रवींद्र चव्हाण यांच्या नेतृत्वाखाली हे आंदोलन पार पडणार आहे. महाविकास आघाडीच्या दुटप्पी धोरणांविरोधात हे आंदोलन असल्याचे भाजपने स्पष्ट केले आहे. विरोधकांचा मोर्चा आणि भाजपचे आंदोलन या दोन्ही कार्यक्रमांमुळे मुंबईत राजकीय वातावरण चांगलेच तापले आहे. दोन्ही आंदोलनांच्या पार्श्वभूमीवर पोलिसांनी कडेकोट बंदोबस्त ठेवला आहे. वाहतुकीच्या दृष्टीनेही विशेष व्यवस्था करण्यात आली असून नागरिकांना पर्यायी मार्गांचा वापर करण्याचे आवाहन करण्यात आले आहे.