महाराष्ट्र लोक सेवा आयोगाची पूर्व परीक्षा २०२४ च्या निकालानंतर ३१८ उमेदवार पात्र ठरले होते. त्यांची मुख्य परीक्षा एप्रिलच्या शेवटच्या आठवड्यात होणार होती. मात्र, आता त्यात बदल करण्यात आला आहे. एमपीएससी पूर्व परीक्षा २०२४ च्या सुधारित निकालानुसार, नव्याने ३१८ उमेदवार पात्र ठरले आहेत. त्यांना मुख्य परीक्षेच्या पूर्वतयारीसाठी पुरेसा अवधी मिळाला नाही. त्यामुळे २६ ते २८ एप्रिल २०२५ ला घेण्यात येणारी मुख्य परीक्षा पुढे ढकलण्यात यावी, अशा मागणीची निवेदने उमेदवारांकडून आयोगाकडे देण्यात आली होती.

उमेदवारांकडून आलेली निवेदने आणि इतर सर्व बाबींचा विचार केल्यानंतर आयोगाने महत्वाचा निर्णय घेतला आहे. मुख्य परीक्षा २०२४ सुधारित वेळापत्रकानुसार २७, २८ आणि २९ मे २०२५ या कालावधीत घेण्यात येणार आहे. मुख्य परीक्षेच्या तारखांमध्ये केलेल्या सुधारणांबाबतचे पत्रक आयोगाच्या संकेतस्थळावर प्रसिद्ध करण्यात आले आहे.