मोदींच्या काळात कोणीच सेफ नाही. शिवसेनेतील आणि राष्ट्रवादीतील आमच्या सहकाऱ्यांना मोदी आणि शहा यांनी वेगळं केलं. त्यामुळे आपण काय बोलत आहोत हे त्यांनी समजून घ्यावं, अशी टीका शिवसेना उद्धव ठाकरे गटाचे नेते संजय राऊत यांनी केली आहे. पंतप्रधान नरेंद्र मोदी यांनी आपल्या प्रचार सभेत ‘एक है तो सेफ है’ हा नारा दिला आहे. त्यावर शनिवारी माध्यमांना प्रतिक्रिया देताना राऊत यांनी मोदींवर टिकास्त्र डागलं.  

पुढे बोलताना राऊत म्हणाले की, शिवसेनेमध्ये आमचं कुटुंब फोडण्याचं काम मोदी आणि शहा यांनी केलं. त्यामुळे एक आहे तर सेफ आहे वगैरे काही नाही. आता तुम्ही 23  तारखेनंतर सेफ रहा इतकच मी सांगेल. शिवसेनेतील सहकाऱ्यांना मोदींनी वेगळं केलं. राष्ट्रवादीतल्या कार्यकर्त्यांना, पदाधिकाऱ्यांना सुद्धा त्यांनीच वेगळं केलं. मग आता 'एक रहेंगे तो सेफ रहेंगे' असं बोलण्याची वेळ त्यांच्यावर कशी आली? असा सवाल उपस्थित करत, आम्ही आमच्या महाराष्ट्रात सेफ आहे. फक्त मोदी आणि शहा आल्यावरच आम्हाला अनसेफ वाटतं, अशी घणाघाती टीका देखील यावेळी संजय राऊत यांनी केली.

Edited By Rakhi Rajput