छत्रपती संभाजीनगर : खासदार संदीपान भुमरेंच्या ड्रायव्हरकडे १५० कोटी किंमत असलेली जमीन असल्याचं आर्थिक गुन्हे शाखेच्या चौकशीत समोर आल्यानं राजकीय क्षेत्रात खळबळ उडाली आहे. संदीपान भुमरे हे शिंदे गटाचे खासदार आहे, तर त्यांचे सुपुत्र विलास भुमरे हे पैठणचे आमदार आहेत. जावेद रसुल हे मागिल अनेक वर्षापासून त्यांचे ड्रायव्हर आहेत. हैदराबाद येथील सालारजंग कुटुंबाच्या वंशजाने जावेद रसुल यांना ही जमीन गिफ्टमध्ये दिल्याचं समोर आलं आहे. ही मालमत्ता भेट म्हणून जावेद रसुलला मिळाली त्याची अंदाजे किंमत १५० कोटी आहे. या प्रकरणी परभणी येथील एका वकिलाने तक्रार केल्यानंतर आर्थिक गुन्हे शाखेनं या जमिनीची चौकशी सुरु केली आहे. या प्रकरणात संदीपान भुमरे आणि विलास भुमरे हे पिता पुत्र अडचणीत येण्याची शक्यता वर्तवली जात आहे.

या सर्व प्रकणावर जावेद रसुलला यांनी प्रतिक्रिया दिली आहे. 'माझ्या वडिलांचे आणि हैदराबादच्या सालारजंग कुटुंबाचं जुने कौटुंबिक संबंध आहेत. त्यामुळे मला ही जमीन गिफ्ट म्हणून मिळाली आहे. त्यात संदिपान भुमरे किंवा विलास भुमरे यांचा काही संबंध नाही. माझी चौकशी करण्यात आलेली आहे. माझ्या जवळचे सगळे डॉक्युमेंट्स मी दिलेले आहेत, त्यामुळे जे आरोप करतात ते चुकीचे आहेत', असं ड्रायव्हर जावेद रसुल यांनी सांगितलं आहे. छत्रपती संभाजीनगर शहरातील मध्यवर्ती भागातील तीन एकर जमीन हैदराबादच्या सालारजंग कुटुंबाने खासदार संदिपान भुमरे यांचे ड्रायव्हर जावेद रसुल यांना दिली होती. त्या जमिनीची सध्याची बाजार भावाची किंमत ही कोट्यावधीमध्ये आहे.