बीड जिल्ह्यातील वाल्मिक कराड असलेल्या कारागृहात एक मोबाईल फोन आढळून आल्यानंतर मोठी खळबळ उडाली आहे. २३ जुलै रोजी रफिक खुर्शिद सय्यद या कैद्याकडे एक छोटा मोबाईल आढळून आला, ज्यानंतर त्याच्याविरोधात शिवाजीनगर पोलीस ठाण्यात गुन्हा नोंदवण्यात आला आहे.या मोबाईलचा वापर कोणत्या उद्देशासाठी करण्यात आला याचा तपास करण्यासाठी पोलीस मोबाईलचा सीडीआर काढणार आहेत. या संदर्भात संबंधित यंत्रणांशी पत्रव्यवहार सुरू असल्याची माहिती समोर आली आहे.

विशेष म्हणजे, बीड कारागृहात सरपंच संतोष देशमुख हत्या प्रकरणातील मुख्य आरोपी वाल्मिक कराड देखील बंदिवासात आहे. त्यामुळे या मोबाईलचा कराडशी काही संबंध आहे का, यावर सध्या संशय व्यक्त केला जात आहे. धनंजय देशमुख यांनी मोबाईलचा सीडीआर काढण्याची मागणी करत या घटनेचा सखोल तपास करण्याची गरज व्यक्त केली आहे.