मनसे अध्यक्ष राज ठाकरे आणि ठाकरे गटाचे प्रमुख उद्धव ठाकरे यांच्या युतीबाबत गेल्या काही दिवसांपासून चर्चा सुरू आहे. अलिकडेच उद्धव ठाकरेंनी पत्रकार परिषदेत एक सूचक विधान केलं, 'मी तुम्हाला बातमीच देणार आहे', असं म्हटलं होतं. त्यामुळे ‘ठाकरे विरुद्ध ठाकरे’ हे चित्र ‘ठाकरे सोबत ठाकरे’ कधी होणार, याकडे सर्वांचे लक्ष लागले आहे.

दरम्यान, राज ठाकरे यांनी या पार्श्वभूमीवर पत्रकारांशी संवाद साधताना एक भन्नाट गुगली टाकली. बाहेर पडताना त्यांनी पत्रकारांना जवळ बोलावलं. पत्रकारांनी विचारलं, "कुठे दौऱ्यावर चाललात?" यावर त्यांनी मिश्कील हसत उत्तर दिलं, "मातोश्रीवर चाललोय!" त्यांच्या या विधानाने उपस्थितांमध्ये एकच खळबळ उडाली. मात्र काही क्षणांतच राज ठाकरे यांच्या चेहऱ्यावरील स्मितहास्य पाहून पत्रकारांना लक्षात आलं की त्यांनी आपली फिरकी घेतली आहे.