भाजप नेत्या आमदार पंकजा मुंडे यांचा बीड जिल्ह्यातील संत भगवान बाबा यांची जन्मभूमी सावरगाव घाट येथे दरवर्षी दसरा मेळावा होत असतो. मात्र यंदाच्या दसरा मेळाव्याला धनंजय मुंडे हे देखील उपस्थित राहणार आहेत. त्यामुळे या दसरा मेळाव्याकडे सर्वांचे लक्ष लागले आहे. या दसरा मेळाव्याला बहीण-भाऊ पहिल्यांदाच एकत्र उपस्थित राहणार आहेत. दोन्ही बहिण-भाऊ एकत्र येणार असल्याने या मेळाव्याकडे संपूर्ण राज्याचे लक्ष लागले आहे.

राष्ट्रवादी काँग्रेसमध्ये फूट पडल्यानंतर अजित पवार भाजपसोबत सत्तेत सहभागी झाले. धनंजय मुंडे हे अजित पवार गटासोबत गेले. त्यामुळे आता भाजप आमदार पंकजा मुंडे आणि धनंजय मुंडे एकत्र आले आहेत. पंकजा मुंडेंच्या लोकसभा विजयासाठी त्यांचे बंधू मंत्री धनंजय मुंडेंनी बरेच प्रयत्न केले. मात्र, त्यांचा लोकसभा निवडणुकीत पराभव झाला. यानंतर पंकजा मुंडे यांची विधान परिषदेवर वर्णी लावण्यात आली. यानंतर हा पहिला दसरा मेळावा आहे. 2023 मध्ये पंकजा मुंडे यांच्या मेळाव्याला धनंजय मुंडे गैरहजर होते. त्यामुळे यावर्षीच्या दसरा मेळाव्याला मंत्री धनंजय मुंडे उपस्थित राहणार का याकडे सर्वांचे लक्ष लागले होते. मात्र, यंदाच्या मेळाव्याला मंत्री धनंजय मुंडे उपस्थित राहणार आहेत. यासंदर्भात धनंजय मुंडे यांनी सोशल मीडियावर पोस्ट करत माहिती दिली आहे.