अक्षय बडवे, साम टीव्ही

पुणे: महाराष्ट्राचा सांस्कृतिक आणि धार्मिक वारसा असलेला गणेशोत्सव आता राज्य महोत्सव म्हणून घोषित करण्यात आला आहे. पावसाळी अधिवेशनात राज्य सरकारने या महत्त्वपूर्ण निर्णयाची अधिकृत घोषणा केली असून, यंदाचा गणेशोत्सव अधिक उत्साहात आणि मोठ्या धुमधडाक्यात साजरा होणार आहे.

पुणे शहरातील गणेशभक्तांसाठी आणखी एक आनंदाची बातमी समोर येत आहे. पुण्यातील कसबा विधानसभा मतदारसंघाचे आमदार हेमंत रासने यांनी पुणे शहरातील गणेशोत्सव २४ तास खुला ठेवावा आणि कोणतेही निर्बंध लागू करू नयेत, यासाठी सरकारकडे ठाम पाठपुरावा सुरू केला आहे.

आमदार रासने म्हणाले, गणेशोत्सव हा फक्त धार्मिक उत्सव नसून तो सामाजिक, सांस्कृतिक आणि आर्थिकदृष्ट्याही अत्यंत महत्त्वाचा आहे. पुण्याचा गणेशोत्सव हा खास ओळख निर्माण करणारा उत्सव आहे. त्यामुळे तो निर्बंधमुक्त आणि भक्तांसाठी २४ तास खुला असावा, हीच आमची भूमिका आहे. राज्यभरातील गणेश मंडळांनी आणि नागरिकांनी या निर्णयाचे स्वागत केले असून, उत्सव अधिक भव्य आणि भाविकांच्या सहभागाने उजळून निघेल, अशी अपेक्षा व्यक्त केली जात आहे.