आयपीएलच्या महायुद्धामुळे देशातील लाखो मुलांचे भवितव्य धोक्यात आले आहे.

अर्जुन खोतकर यांनी विधानसभेत यावर भाष्य करताना प्रत्येक चेंडूवर, चौकारावर आणि षटकारावर सट्टा लावला जात आहे. या सट्टेबाजांच्या टोळ्या सर्वत्र कार्यरत असून, पोलिसांना याबाबत सर्व माहिती आहे. तसेच त्यांनी जालना शहरात मोठ्या प्रमाणावर सट्टा चालू असल्याचे उघड केले.

आमदार खोतकर यांनी दावा केला की या सट्टा रॅकेटचे सूत्रधार असलेल्या दहा लोकांची नावे त्यांच्याकडे आहेत. विशेषतः 'मनोज' नावाचा एक व्यक्ती पोलिसांना हप्ते देत असून, तो खुलेआम सट्टा चालवतो, असा गंभीर आरोप त्यांनी केला.

सट्ट्याच्या विळख्यात अडकलेल्या दहा तरुणांनी आत्महत्या केल्याची धक्कादायक माहिती त्यांनी सभागृहात सादर केली. यासोबतच, अनेक उद्योजकांची मुलेही या विघातक प्रवृत्तीचा बळी ठरत असल्याचे त्यांनी निदर्शनास आणले.