शिवसेना शिंदे गटाचे सिल्लोडचे आमदार अब्दुल सत्तारांनी अडीच वर्षांनी पुन्हा मंत्री होईल असा विश्वास व्यक्त केला आहे. त्यांच्या या वक्तव्याने सगळ्यांच्या भुवया उंचावल्या आहेत. इतकंच नाही तर, जास्त हुशार्‍या मारू नका, असा खोचक इशाराही त्यांनी यावेळी बोलताना विरोधकांना लगावला आहे.

महायुती सरकारचा मंत्रीमंडळ विस्तार नुकताच झाला आहे. यात अनेक नेत्यांचा पत्ता कट झाला आहे. शिवसेना शिंदे गटाचे आमदार अब्दुल सत्तार यांचीही कॅबिनेटमध्ये वर्णी लागलेली नाही. याला आता स्वतः अब्दुल सत्तार यांनी प्रत्युत्तर देत विरोधकांना थेट इशारा दिला आहे. ते म्हणाले की, मी चौथ्यांदा विधानसभेत निवडून गेल्यानंतर सिल्लोडला मंत्रीपद मिळेल अशी सगळ्यांनाच अपेक्षा होती. मात्र ते मिळालं नाही. मी नाराज नाही आणि कार्यकर्त्यांनी नाराज राहू नये. मी अडीच वर्षानंतर मंत्री म्हणून मी पुन्हा येईल, जास्त हुशार्‍या मारू नका, असा इशारा त्यांनी दिला आहे.