पुणे-बेंगळुरू महामार्गावर खेड शिवापूरजवळ ससेवाडी गावाच्या हद्दीत आज दुपारी सुमारे १२.३० वाजता एका प्रवासी व्होल्व्हो बसला भीषण आग लागण्याची घटना घडली. या आगीत संपूर्ण बस जळून खाक झाली असून, सुदैवाने बसमधील सर्व ३० प्रवासी सुखरूप बचावले आहेत.आग लागल्यानंतर बसमध्ये धुराचे लोट पसरले आणि भीतीमुळे प्रवाशांनी तात्काळ बसमधून उड्या मारून आपला जीव वाचवला. आग नेमकी कशामुळे लागली याचे कारण अद्याप स्पष्ट झालेले नाही.

ही बस पुण्याहून बंगळुरूच्या दिशेने जात होती. दुर्घटनेनंतर महामार्गावर मोठ्या प्रमाणावर वाहतूक कोंडी झाली आहे. अग्निशमन दल घटनास्थळी दाखल होण्यासाठी मार्गस्थ आहे. बसमधून धुराचे आणि आगीचे मोठे लोळ परिसरात उठताना दिसत असून, या घटनेमुळे नागरिकांमध्ये एकच खळबळ उडाली आहे. अधिक तपशील प्रतीक्षेत आहेत.