मुंबईत पुन्हा एकदा मराठीची गळचेपी झाल्याचं समोर आलं आहे. नोकरीसाठी गेलेल्या एक तरूणावर कंपनीने अन्याय केल्याचा प्रकार समोर आलाय. मुंबईत राधेशाम ब्रदर्स कंपनीमध्ये मुलाखतीसाठी गेलेल्या मराठी तरुणाला कामावर घेण्यास कंपनीने नकार दिला आहे.

राज्यातल्या अनेक भागात मराठी भाषेचा आणि मराठी माणसाचा सध्या अपमान होताना बघायला मिळत आहे. पुणे, मुंब्रामधील मराठी-आमराठीचे वाद ताजे असतानाच आता मुंबईत पुन्हा एकदा मराठीची गळचेपी झालेली बघायला मिळाली आहे. राधेशाम ब्रदर्स या मुंबईतील कंपनीमध्ये नोकरीच्या मुलाखतीसाठी गेलेल्या मराठी तरुणाला कंपनीने मराठी माणूस नको म्हणून काम देण्यास नकार दिला आहे. कामासाठी आम्हाला मराठी मुलं नकोय, असं संतापजनक वक्तव्य कंपनी मालकाने केलं आहे. तसंच मला मराठी येत नाही, तुम्ही हिंदीतून बोला असंही कंपनी मालकाने म्हटलं आहे. या संपूर्ण प्रकारानंतर शिवसेना उद्धव ठाकरे गटाचे संतोष शिंदे यांनी कंपनी मालकाला जाब विचारला आहे. आता या सगळ्या प्रकारावर मनसे काय भूमिका घेणार हे पहाणं महत्वाचं ठरणार आहे.