विधानसभेत उमेदवार उभे करायचे की पाडापाडी करायची याचा निर्णय मराठा आंदोलक मनोज जरांगे पाटील येत्या 20 ऑक्टोबरला कार्यकर्त्यांशी चर्चा करून घेणार आहेत. मात्र त्या आधी आज इच्छुक उमेदवारांकडून त्यांनी विधानसभेसाठी अर्ज मागवले असून त्यांच्याशी ते संवाद साधणार आहेत.

महायुती सरकारने विधानसभा निवडणुकीच्या पूर्वी मराठा आरक्षणावर कोणताही निर्णय घेतलेला नसल्याने आता मनोज जरांगे पाटील यांनी आक्रमक भूमिका घेत विधानसभा निवडणूक लढवण्याची तयारी सुरू केली आहे. आज अंतरावली सराटीत मनोज जरांगे विधानसभा लढवण्यासाठी इच्छुक असलेल्या उमेदवारांशी चर्चा करणार आहेत. तर 20 ऑक्टोबरला निवडणूक लढवायची की पाडापाडीचं राजकारण करायचं यावर भूमिका स्पष्ट करणार आहेत. त्यापूर्वी इच्छुकांना कागदपत्र तयार करण्याच्या सूचना देखील त्यांनी दिल्या आहेत. अंतरावली सराटीत राज्यभरातून इच्छुक उमेदवारांनी गर्दी केली आहे. सरपंच पांडुरंग तारक यांच्या मळ्यात मनोज जरांगे हे इच्छुकांशी संवाद साधणार आहे. त्यामुळे आता ते काय निर्णय घेतात याकडे सगळ्यांचं लक्ष लागलं आहे.